ADCC 2026 turnirining birinchi kunida amerikalik Dorian Olivarez va qozog'istonlik Bekzat Kapashov o'rtasidagi bahsdan so'ng ommaviy mushtlashuv yuz berdi. Natijada ikkala sportchi ham tartibsizlikdagi ishtiroki uchun musobaqadan chetlatildi va bir yillik diskvalifikatsiya jazosini oldi. Ushbu voqea turnirning birinchi kunidagi eng asosiy muhokama mavzusiga aylandi.
Mushtlashuv Olivarez raqibini og'ritish usuli bilan mag'lub etganidan keyin darhol boshlangan. Kapashovni qo'llab-quvvatlash uchun kelgan o'n beshga yaqin qozog'istonlik muxlislar jamoasi Olivarez hamda uning murabbiylariga tashlangan. Voqea joyida bo'lgan braziliya jiu-jitsusi afsonasi Gordon Rayan jamoadoshlarini himoya qilish uchun janjalga aralashgan va guruh tomonidan zarbalar qabul qilib olgan.
Rayanning so'zlariga ko'ra, mushtlashuv boshlangan vaqtda u boshqa gilamchada shogirdiga ko'rsatmalar berayotgan bo'lgan. Vaziyatni ko'rgach, u darhol voqea joyiga yugurgan va hujum qilganlardan biriga zarba bergan. Shundan so'ng qolganlar uni tanib qolib, Gordonning o'ziga tashlanishgan. Besh-olti kishi uni yiqitib, boshiga musht va tepkilar tushirganini ta'kidlagan bo'lsa-da, sportchi bu holatni shunchaki qiziqarli sarguzasht deb atadi.
«Mushtlashuv uchun qozog'istonlik yigitlarga rahmat. Bu juda qiziqarli bo'ldi. Shuni doimo unutmangki, men har kecha tunning eng yaxshi jangi ishtirokchisiman», — dedi Rayan bergan bayonotida.
Tashkilotchilar ushbu voqea yuzasidan qat'iy choralar ko'rishdi. Dorianning otasi va murabbiyi Mayk Olivarez ham ikki yilga musobaqalardan chetlatildi hamda unga ADCC tadbirlariga qatnashish taqiqlandi. Turnir g'olibligiga asosiy da'vogarlardan biri hisoblangan Dorian Olivarezning o'rnini endi -66 kg vazn toifasida sobiq «B-Team» a'zosi Ouen Jons egallaydi va musobaqani davom ettiradi.
Izohlar 0
Hali izoh yo‘q — birinchi bo‘ling
