PSSJ bosh murabbiyi Angliya klubining 115 ta ayblov bo‘yicha aybdor deb topilganidan hayratda ekanini va ular maydonda yutgan sovrinlariga to‘la munosibligini ta’kidladi.
«PSSJ» bosh murabbiyi Luis Enrike Chempionlar ligasi doirasidagi o‘yin oldidan 
Manchester Siti jamoasining moliyaviy qoidalarni buzganlikda aybdor deb topilganiga o‘z munosabatini bildirdi. U ingliz klubiga qo‘yilgan ayblovlardan hayratda ekanini va ular jazodan qochib qutula olishiga umid qilayotganini aytib o‘tdi.
Chorshanba kuni qatorasiga ikki marta Yevropa chempioni bo‘lgan «PSSJ» mehmonda «Siti»ga qarshi maydonga tushadi. Bu mankunianliklarning jami 115 ta ayblovning aksariyat qismida aybdor deb topilganidan keyingi dastlabki uy uchrashuvi bo‘ladi.
Seshanba kuni «Etihad» stadionida bo‘lib o‘tgan matbuot anjumanida Enrike shunday dedi:
«Manchester Siti» atrofida shov-shuvlar ko‘p va umuman olganda bunday katta klublar atrofida doim shov-shuvlar bo‘ladi. Biz shunchaki yakuniy qaror qanday bo‘lishini kutishimiz kerak. Umid qilamanki, ular uchun barchasi yaxshi yakunlanadi, chunki ularning so‘nggi yillarda maydonda ko‘rsatgan o‘yini aql bovar qilmas darajada bo‘ldi va ular barcha sovrinlarni yutishga munosib edilar», — dedi mutaxassis.
Mustaqil komissiya «Siti»ni 2009-yildan 2018-yilgacha bo‘lgan 9 yillik davr mobaynida homiylik shartnomalari orqali futbol faoliyatiga yashirincha 830 million funt sterlingdan ortiq mablag‘ yo‘naltirib kelganlikda aybdor deb topgan. Klub o‘zining aybsizligini ta’kidlab, apellatsiya bergan.
Chorshanba kungi o‘yinda Enrikening yaqin do‘sti, jamoani 10 yil davomida boshqarib, 20 ta sovrin yutgan sobiq murabbiy Pep Gvardiola o‘tgan mavsum oxirida klubdan ketganidan so‘ng ilk bor «Etihad»ga qaytishi kutilmoqda.
Ma’lumot o‘rnida, 2014-yilda har ikkala klub ham moliyaviy qoidalarni buzgani uchun UYeFA tomonidan jarimaga tortilgan edi. «Siti» 2008-yilda 200 million funt sterling evaziga Abu Dabi qirollik oilasi a’zosi Shayx Mansur tomonidan sotib olingan bo‘lsa, «PSSJ»ga Qatar sport investitsiyalari fondi egalik qiladi.
Shuningdek, «PSSJ» hujumchisi Usmon Dembeledan hozirgi qiyin holatda raqibga qarshi o‘ynash qanchalik to‘g‘ri vaqt ekani haqida so‘ralganida, u shunday javob berdi: «Hozir yaxshi yoki yomon davr bo‘lishidan qat’i nazar, ularga qarshi o‘ynash doim qiyin. Ularda yuqori darajadagi futbolchilar va ajoyib murabbiy bor».
Izohlar 2
- Bekzod
nima bolgan
- Bekzod
@Bekzod, bilmadim
