«Atalanta» Chempionlar ligasining nimchorak finaliga yo'llanma olgan A Seriyaning yagona vakili bo'lib qoldi. Ushbu haftada Italiyaning top-klublari kutilmaganda Yevropa musobaqalarini tark etishdi. Pley-off bosqichida A Seriya peshqadami bo'lgan «Inter» mavsumoldi yig'inini o'tkazayotgan Norvegiyaning «Budyo-Glimt» klubiga yengildi, «Yuventus» esa ikki o'yin natijasiga ko'ra «Galatasaroy»ga 7:5 hisobida imkoniyatni boy berdi.
Italiya futboli uchun bu hafta jiddiy pasayish bilan yodda qoladi. Yagona ijobiy natija Lazar Samarjich tomonidan 98-daqiqada urilgan penalti evaziga «Atalanta»ning keyingi bosqichga chiqishi bo'ldi. Bungacha esa amaldagi chempion «Napoli» liga bosqichidan o'ta olmagan bo'lsa, «Milan» bu mavsumda umuman Yevrokuboklarda ishtirok etmayapti.
«Italiya jamoalari sekin tezlikda o'ynashadi, — dedi Fabio Kapello Italiyadagi Sky kanaliga. — Ular yuguradigan va pressing qiladigan jamoalarga to'qnash kelganida, ularga sifat yetishmaydi, yuqori tempda o'ynashga odatlanmagan va xatolarga yo'l qo'yishadi. Biz sekin tezlikda o'ynaymiz, afsuski, bunday holatda xavfli bo'lish qiyin».
Bu muvaffaqiyatsizliklar A Seriyadagi o'yin tezligining pastligi va moliyaviy muammolar tufayli yuzaga kelgan. Klublar ko'proq Luka Modrich, Kevin De Bryuyne va Jeymi Vardi kabi yoshi katta erkin agentlarga tayanib, sifatli yoshlarni yetishtirishda oqsoqlanmoqda. Raqamlarga e'tibor qaratsak, 2025-yilda Italiya A Seriyasida 21 yoshgacha bo'lgan futbolchilarga atigi 1,9 foiz o'yin amaliyoti berildi va bu borada dunyoning kuchli 50 ta ligasi orasida oxirgidan oldingi o'rinni egalladi.
Ushbu qiyin vaziyat Italiya milliy terma jamoasiga ham ta'sir o'tkazishi mumkin. To'rt karra g'oliblar Jahon chempionatini ketma-ket uchinchi bor o'tkazib yubormaslik uchun pley-off bahslarida g'alaba qozonishi shart. Yana bir e'tiborli jihati, klublar miqyosida «Fiorentina» Konferensiyalar ligasining nimchorak finaliga chiqish uchun Polshaning «Yagelloniya Belostok» jamoasiga qarshi pley-off o'yinini o'tkazadi.
Izohlar 0
Hali izoh yo‘q — birinchi bo‘ling
