Chimayev Bernsni texnik ustunlik bilan yengib, RAF’dagi uchinchi g‘alabasini qayd etdi. Endi u Kolbi Kovington bilan kuch sinashishga qiziqmoqda.
Hamzat Chimayev RAF 13 turnirining ikkinchi asosiy bahsida Gilbert Berns ustidan ishonchli g‘alaba qozondi.** Kurash qoidalari asosida o‘tgan uchrashuv ikkinchi davrada 15:4 hisobida yakunlandi. Ochkolardagi katta farq sabab bahs muddatidan oldin to‘xtatilib, Chimayev texnik ustunlik bilan g‘olib deb topildi.
Hamzat uchrashuv boshidanoq faol harakat qildi. U raqibini gilam chegarasidan chiqarib, dastlabki ochkoni oldi, so‘ng ustunligini 5:0 ga yetkazdi. Berns javob hujumida ikki ochko ishladi, biroq Chimayev tashabbusni boy bermadi. Birinchi davra 11:2 hisobida tugadi.
Ikkinchi davrada Berns ochkolarini to‘rttaga yetkazib, farqni qisqartirdi. Ammo Hamzatning navbatdagi to‘rt ochkolik harakati uchrashuv taqdirini hal qildi. Yakuniy hisob 15:4 bo‘ldi.
Bu natija Chimayevning RAF’dagi uchinchi g‘alabasi bo‘ldi. U tashkilotdagi barcha uchrashuvlarida g‘olib chiqib, mag‘lubiyatsiz yurishini davom ettirmoqda.
Bahsdan so‘ng Hamzat navbatdagi raqib sifatida RAF crossover kamari sohibi Kolbi Kovington bilan uchrashishga qiziqish bildirdi. Hozircha bu to‘qnashuvning o‘tkazilishi rasman tasdiqlangani haqida ma’lumot yo‘q.
Eslatib o‘tamiz, Chimayev va Berns 2022-yil aprel oyida UFC 273 turnirida ham to‘qnash kelgan. O‘shanda uch raund davom etgan MMA jangida Hamzat hakamlarning yakdil qarori bilan g‘alaba qozongan edi.
*Manba: [MMA Fighting — Yahoo Sports
Izohlar 0
Hali izoh yo‘q — birinchi bo‘ling
