UFC o‘rta vazn toifasi chempioni Shon Striklend tashkilot jangchilarga nafaqaga chiqish uchun yetarli pul to‘lamasligini aytdi. U faoliyatini boksda davom ettirmoqchi.
Ikki karra UFC o‘rta vazn toifasi chempioni Shon Striklend tashkilot jangchilarga faoliyatini o‘z xohishiga ko‘ra yakunlashi uchun yetarli darajada maosh to‘lamasligini aytdi.
35 yoshli sportchining ta’kidlashicha, chov va yelka jarohatlaridan so‘ng uning ko‘ngli aralash yakkakurashlardan qolgan. Striklend boksga o‘tishni afzal ko‘rishini, bu sport turi ancha oson ekani hamda u yerda ko‘proq pul ishlash mumkinligini aytib, Jeyk Polni jangga chorlagan.
«Men hech kim gapirmaydigan narsani ochiq aytmoqchiman. Siz vazn toifasida yetakchilik qilayotgan chempionlarni ko‘rasiz, ular yutqazib qo‘yishadi, keyin esa uch-to‘rt marta qaytib kelib, chuqur nokautga uchrashadi. Tashkilot senga faoliyatni yakunlash uchun yetarli pul to‘lamaydi. Shuning uchun sen qaytib kelib, o‘z merosingni barbod qilishga majbursan. Men buni xohlamayman», — deya ta’kidladi amerikalik jangchi o‘zining Instagram sahifasida.
Joriy yilda bokschi Konor Benn Deyna Uaytga tegishli bo‘lgan Zuffa Boxing bilan bir jang uchun kattagina shartnoma imzolaganidan so‘ng, MMA jangchilarining maoshi masalasi sportchilar va ommaviy axborot vositalari tomonidan keskin muhokama qilinmoqda. Uayt buni ijobiy holat deb baholagan va 2001-yildan beri gonorarlar miqdori muttasil o‘sib borayotganiga e’tibor qaratgan.
UFC prezidenti «Paramount» bilan tuzilgan yangi translyatsiya shartnomasini eslatib, kelgusi yetti yil ichida jangchilarning gonorari bilan bog‘liq muammo bo‘lmasligiga va’da berdi.
Amaldagi qoidalarga ko‘ra, jangchilar UFC bilan shartnoma muddati tugamasdan turib boshqa yirik tashkilotlarda musobaqalasha olmaydi. Boks bo‘yicha chempionlik unvonini qo‘lga kiritishni istayotgan Striklend ushbu banddan umuman norozi ekanini yashirmadi.
Eslatib o‘tamiz, may oyida bo‘lib o‘tgan jangda Striklend 
Hamzat Chimayevni mag‘lubiyatga uchratib, o‘rta vazn toifasida ikkinchi bor chempionlik kamarini qo‘lga kiritgan edi.
Izohlar 0
Hali izoh yo‘q — birinchi bo‘ling
