«Lester Siti» Angliya futbolining uchinchi divizioni hisoblangan EFL Birinchi ligasi qatnashchisiga aylandi va hozirda o'z tarixidagi eng qiyin davrlardan birini boshdan kechirmoqda. Kuni kecha jamoa safarda «Stokport Kaunti» ustidan 4:3 hisobida g'alaba qozonib, klub tarixidagi eng past ko'rsatkich bo'lgan 19-o'rindan biroz yuqoriga ko'tarildi. O'yin davomida 4:1 hisobida oldinda borayotgan «tulkilar» himoyada xatolarga yo'l qo'ygach, muxlislar bosh murabbiy Rassel Martinga o'z e'tirozlarini bildirishdi.
Jamoaning tailandlik egalari bo'lmish Srivaddhanaprabha oilasi klubni 200 million funt sterlingdan ortiq summaga sotishga tayyor. Xabarlarga ko'ra, xaridor topish vazifasi «Citbank»ka topshirilgan va qiziqish bildirgan tomonlar dushanba kunigacha o'z takliflarini tasdiqlashlari belgilangan. Shotlandiyalik-hindistonlik tadbirkor Nil Lal jamoani sotib olish niyatida ekanligini hamda klubni Chempionship orqali qaytadan Premyer-liga musobaqasiga olib chiqishni o'z ichiga olgan besh yillik rejasini ommaga e'lon qildi.
O'n yil oldin «Lester Siti» Chempionlar ligasida debyut qilib, Belgiyaning «Bryugge» klubi ustidan 3:0 hisobida g'alaba qozongan va chorak finalda «Atletiko Madrid»ga mag'lub bo'lgandi. Shuningdek, 2016-yilda Premyer-liga chempionligini va 2021-yilda Angliya kubogi g'olibligini qo'lga kiritgan jamoa 2022-yilda Yevropa ligasi yarim finalida «Roma»ga qarshi o'ynagan. Bugungi kunda qatorasiga uchinchi bor quyi ligaga tushib ketish xavfi ostida qolgan klub barqarorlikka muhtoj bo'lib turibdi.
«Odamlarni faqat g'alaba qozonishni boshlaganimizdagina xursand qila olamiz deb o'ylayman va biz bunga albatta erishamiz. Men bu yerda o'tirib o'zimni himoya qilmoqchi emasman. Odamlar ko'rishni xohlaydigan yagona narsa bu g'alabadir», — dedi jamoa bosh murabbiyi Rassel Martin.
Murabbiy va «Lester Siti» oldinga siljish uchun faqat g'alaba qozonishda davom etishlari talab etiladi. Endi ularni Chempionlar ligasi doirasidagi «Bryugge»ga qarshi safarlar emas, balki odatiy o'yinlar kutmoqda. Jamoa kelasi shanba kuni navbatdagi bahsni safarda «Barnsli»ga qarshi o'tkazadi.
Izohlar 0
Hali izoh yo‘q — birinchi bo‘ling
