Yarimo‘rta vazn toifasi vakillari Shavkat Rahmonov va Maykl Morales tez orada oktagonga qaytishi kutilmoqda. Qozog‘istonlik jangchi ijtimoiy tarmoqlarida ushbu to‘qnashuvga ishora qildi.
Yarimo‘rta vazn toifasidagi eng yaxshi jangchilar 
Shavkat Rahmonov va 
Maykl Morales uzoq tanaffusdan so‘ng tez orada oktagonga qaytishi mumkin. Xabarlarga ko‘ra, ushbu ikki yengilmas sportchining o‘zaro to‘qnash kelish ehtimoli mavjud.
Yaqinda Morales maxsus video e’lon qilib, divizion chempioni Islam Maxachev, shuningdek, Karlos Prates, Ien Machado Garri va Rahmonovni jangga chorlagan. U o‘z murojaatida qozog‘istonlik jangchini «yakuniy boss» deb atagan.
Garchi hozircha hech qanday rasmiy kelishuv bo‘lmasa-da, Rahmonovga bu g‘oya ma’qul kelgan ko‘rinadi. U o‘zining TikTok sahifasida 19-0 ko‘rsatkichini xuddi shunday natijaga ega Moralesning rekordi bilan taqqoslab, kutilayotgan to‘qnashuvga ishora qilgan.
Qayd etish joizki, Morales so‘nggi bor 2025-yil noyabr oyida Shon Bredini mag‘lub etganidan beri jang o‘tkazmadi. Rahmonov esa tizzasidagi doimiy jarohatlar sababli 2024-yil dekabr oyidan buyon musobaqalarda ishtirok etmayapti.
Tanaffusga qadar Rahmonov Ien Machado Garrini mag‘lub etgan, uning yo‘qligida esa Garri chempionlik uchun Maxachevga qarshi oktagonga chiqqan edi. O‘z navbatida, Morales Bredi, Jilbert Byorns va Nil Magnini ketma-ket birinchi raunddayoq nokautga uchratib, o‘zini chempionlikning asosiy da’vogarlaridan biri sifatida ko‘rsata oldi.
Izohlar 0
Hali izoh yo‘q — birinchi bo‘ling
