12-dekabr kuni Las-Vegasda bo‘lib o‘tadigan UFC 335 musobaqasining markaziy janglarida Charlz Oliveyra, Aleks Pereyra va Jo Payfer kabi jangchilar oktagonga ko‘tariladi.
UFC rahbari Deyna Uayt shanba kungi UFC 332 translyatsiyasi vaqtida 12-dekabr kuni Las-Vegasdagi «T-Mobile Arena»da bo‘lib o‘tadigan UFC 335 turnirining uchta asosiy jangini ma’lum qildi. Turnir doirasida Charlz Oliveyra BMF kamari uchun Diyego Lopesga qarshi jang qilsa, og‘ir vazn toifasida 
Aleks Pereyra rossiyalik 
Sergey Pavlovich bilan besh raundlik bahsda kuch sinashadi.
BetOnline.Ag kompaniyasi ushbu musobaqa janglari uchun dastlabki bukmekerlik kotirovkalarini e’lon qildi. Og‘ir vazndagi bahsda fovorit sifatida Pavlovich e’tirof etilmoqda. Uning g‘alabasiga dastlab -130 koeffitsiyent berilgan bo‘lsa, keyinchalik kiritilgan mablag‘lar evaziga bu ko‘rsatkich -164 gacha tushdi. Bu rossiyalik jangchining g‘alaba qozonish ehtimoli 62 foiz ekanligini anglatadi. Eslatib o‘tamiz, Pereyra og‘ir vazndagi debyutini UFC White House turnirida o‘tkazib, Siril Ganga imkoniyatni boy bergan edi.
Asosiy jang hisoblangan BMF unvoni uchun kechadigan bahsda amaldagi kamar sohibi Oliveyra fovorit (-148) hisoblanmoqda. U o‘zining so‘nggi jangida UFC 326 turnirida Maks Holloueyni mag‘lubiyatga uchratgan va ayni paytda ikkita g‘alabali seriyaga ega. Yengil vazn toifasida debyut qilayotgan Lopes esa so‘nggi bor UFC White House musobaqasida Stiv Garsiyani nokautga uchratgan.
Turnirning yana bir markaziy jangi o‘rta vazn toifasidagi Jo Payfer va Bo Nikal o‘rtasida o‘tkaziladi. Bukmekerlar to‘rtta jangdan iborat g‘alabali seriyaga ega bo‘lgan va mart oyida o‘rta vaznning sobiq chempioni Israel Adesanyani nokautga uchratgan Payferni (-130) sobiq NCAA chempionidan biroz ustun ko‘rishmoqda. Nikal o‘zining so‘nggi ikkita jangida g‘alaba qozongan va iyun oyida Kayl Dokasni to‘xtatib qolgan.
Izohlar 0
Hali izoh yo‘q — birinchi bo‘ling
